سهم ابن سينا من الشركات القوية جدا، ولكن الهبوط مستمر لأكتر من تلات سنين، السهم عمل قاع وارتد عنده بقوة من مستوى 1.1 (دايرة حمرا). للأسف مقدرش مع الارتداد القوي ده إنه يطلع كتير ونزل 3 مرات تاني لمستوى 1.7 ومقدرش يكسرها لتحت بس برضه ماارتدش لفوق (الدواير الخضرا)، ده بنسميه "الطرق" كأنه بيحاول يخبط نفس النقطة ويفشل يطلع فوق أكتر ويرجع ينزل يخبطها وهكذا لغاية ما سيناريو من اتنين يحصل: 1) الاحتمال الأول إنه يرتد من مستوى 1.7 (الأسهم الزرقا) ويطلع فوق EMA 200 يديله دعم ويتحرك عرضي ما بينه وبين EMA 50 لفترة هتكون طويلة نسبيا لحد ما ياخد دعم كافي ويطلع بس غالبا لحد مستويات 2.5 – 2.7 وبعدها نراجع الشارت ونقرر نخرج ولا نستنى 2) الاحتمال التاني إنه في تالت خبطة ينجح في الكسر وينزل لمستوى 1.1 (الأسهم الحمرا)، على قد ما ده هيضايق حامل السهم بس الأغلب إنه هيعمل (Double Bottom) قوي جدا جدا وساعتها الارتداد هيكون عنيف ونراجع بعدها ممكن يوصل لفين. طبعا احتمالات أضعف إنه يطلع من غير تحرك عرضي أو ينزل تحت 1.1 بس في رأيي احتمالات ضعيفة. اللي مشتري من حوالين 2 جنيه زيي ممكن يستنى، أنا شخصيا هاحتفظ، اللي عايز يدخل يستنى كام يوم ويراقب الشموع اللي هتتكون ويقرر على أساس أنهي مسار بيتكون من الاحتمالين اللي بعتهم هنا. ربنا يكرمكم جميعا إن شاء الله