طرح محدود ونمو غير موجود في البداية، حابب أعرف القُرّاء بالفكرة: إن المصرف المتحد نشأ بسبب استحواذ البنك المركزي المصري على 3 بنوك أعلنت إفلاسها. وده كان بسبب الفساد الداخلي للبنوك، وكمان مديري الأصول والمحافظ للبنك سبق ليهم التورط في عمليات تمويل رجال أعمال بدون وجود ضمان. فيخلع برا البلد وخلصت. وده كان الوضع في الـ3 بنوك:
1-بنك النيل
2-البنك المصري المتحد
3-المصرف الإسلامي الدولي للاستثمار والتنمية
وبعد الإخطرات والطلبات الكتيرة اللي وصلت للبنك المركزي لطلب قروض وجدولة الديون، تدخل البنك المركزي في نهاية 2005 وحتى 2006، وراجع الأصول المتبقية للـ3 بنوك ودمجهم في كيان واحد اسمه "المصرف المتحد". وصفوه وقتها إنه "ولادة قيصرية لجثة قضى عليها الفساد، والجنين مريض مجهول الأب".
ومن وقتها، كل العملاء اللي كان ليهم فلوس في البنوك خدوا فلوسهم، وبقى المالك للبنك هي الحكومة المصرية باسم البنك المركزي.
2016:
بعد عملية التعويم ومرور 10 سنين على الدمج، قرر البنك المركزي بيع البنك في السوق الدولي.
ومن 2016 إلى 2018، محدش كان عايز يشتري البنك بالسعر المستهدف اللي يعوض الخسائر ويحقق أي نوع من الربح.
في سنة 2019، ظهر صندوق أمريكي خاص أبدى رغبته في شراء البنك، وكان عايز يعمل "فحص نافٍ للجهالة" بشكل مكشوف عشان يشوف القيمة الحقيقية للبنك.
وكان البنك المركزي قدر يوصل رأس مال البنك إلى 3.5 مليار جنيه مصري، أو ما يعادل 200 مليون دولار وقتها.
لكن بعد الاطلاع على بيانات البنك، العملية ما اكتملتش.
2024:
أخيرًا، تقرر الطرح العام للبنك بنسبة 30%:
25% للطرح الخاص
5% للطرح العام
وكانت النتيجة إقبال كبير، غطى الطرح 6 مرات، لكن ده خلى سعر الطرح العام 13.85 جنيه للسهم، وده أقل من المتوقع. السبب إن الحكومة بتبيع جزء صغير جدًا من البنك (30%) مع الاحتفاظ باليد العليا بنسبة 70%، فمفيش أي تغييرات جوهرية ممكن تحصل داخل البنك.
الإقبال على الطرح الخاص كان أعلى، وغطى الطرح 54 مرة. وده كان بسبب الـOverselling اللي حصل من شركات السمسرة. أمر طبيعي بسبب الأرباح اللي حصلت في اكتتاب ACT، فدخل ناس كتير مش عارفين البنك بيعمل إيه، ولا حتى زاروا فرع للبنك قبل كده.
بعد الطرح، حصل المتوقع، السهم انهار تقريبًا لسعر 13.95 جنيه، أعلى بـ10 قروش فقط من سعر الطرح. يعني لو كسبت 1%، خسرتهم بالكامل في عمولات الاكتتاب، البيع، الشراء، وأمين الحفظ.
تدخلت الصناديق لدعم السهم، لكنه بقى في تحرك عرضي.
الخلاصة:
البنك مش هيقدم خدمات جديدة؛ هو محتاج الفلوس لسداد الديون الحكومية. يعني التمويل من الاكتتاب مش هيأثر على أي شيء جوه البنك. الطرح حقق تغطية أقل حتى من الاكتتابات اللي قبله.
في 2019، رأس مال البنك بالكامل كان 3.5 مليار جنيه، وتم بيع 30% منه فقط بـ4.5 مليار جنيه.
